كتبت : سالى عبده
لكل أم .. مع بداية العام الدراسى الجديد .. بقدملك نصائح مهمة جدا خلى بالك منها :
– مهم اوي ان لبس المدرسة يكون مقاس ابنك.. مش اصغر ولا اكبر .. اوعي بنطلونه يكون قصير عليه.. او يكون بيقع منه وبيخاف يجري بسببه ..
– اهتمي بشعر بنتك .. حطيلها توك بتحبها واوعي تسيبيها تنزل منكوشة واصحابها يتريقوا عليها ..
– اهتمي بريحتهم.. بأسنانهم.. ونظافتهم الشخصية.. ماتسيبيش صحابهم ياخدوا جنب منهم ويتجنبوا القعاد جنبهم ..
– الطفل الخايف المهزوز اللي بيتضرب .. شجعيه وخليه ميخافش ويدافع عن نفسه بنفسه ..
– والطفل الجريء والمتهور قوليله اوعي تأذي حد واللي يزعلك اشتكي للمدرس ومتضربش حد …
– علميهم مايتريقوش علي صحابهم ومايزعلوش حد ..
– علميهم يدافعوا عن الضعيف ويقفوا قدام الشخص المؤذي ..
– علميهم مايسيبوش حد قاعد لوحده في وقت الفسحة .. ومايسيبوش حد من غير أصحاب .. وميندهوش حد باسم بيضايقه .. ولا يطلعوا ألقاب علي بعض ..
– لو المدرسة فيها شخص مميز .. لون بشرته .. او وزنه .. او مشيته .. او صوته .. علميهم ان ده عادي والبشر مختلفين ومايصحش وعيب وحرام نتريق علي اللي مختلف عننا ..
– علميهم يحطوا نفسهم مكان المختلف .. واللي مالوش أصحاب .. واللي نسي أكله .. والضعيف .. يحسوا إحساسهم ويتعاطفوا معاهم ..
– علميهم ازاى يبقي عندهم انسانية .. بس قبلها علميهم يبقوا واثقين من نفسهم ..
– اسمعيهم واعرفي ايه اللي بيضايقهم واللي بيخوفهم واللي بيعانوا منه في المدرسة ووسط اصحابهم ..
– اشتغلي علي نقط ضعفهم ومتسمحيش لحد يأذي مشاعرهم ..
حاجات بسيطة اوي احنا مابنشوفهاش بس بتبقي كبيييييرة اد الدنيا عند أولادنا وبتأثر علي حياتهم ومستقبلهم ..
اللهم انا استودعناك أولادنا في عام دراسي جديد فاحفظهم من كل شر وسوء وبارك فيهم ..
