كتبت ؛ داليا عبد الرحمن
في المقال ده انا هجاوب على السؤال الأزلي اللي كل الامهات بتسأله في اي مناسبة و اي زمان و اي مكان و في نقط بسيطة و مختصرة : 👇
🔵1-الرضاعة الطبيعية : خط الدفاع الاول و الاقوى على الاطلاق لتقوية المناعة ..
🔵2- التطعيمات : الاجبارية و الاضافية و تطعيم الانفلونزا السنوي .. نظرة واحدة لجوجل عن عدد الوفيات السنة اللي فاتت في الاماكن اللي موش بتوصل لها التطعيمات و انتي تعرفي مدى اهميتها ..
🔵3- غذاء صحي و متوازن :
✅ يعني 3 وجبات اساسية و معاهم اتنين ” سناك ” او وجبات خفيفة مع الاهتمام بوجبة الفطار بشكل خاص ..
✅ نكتر من الخضار و الفاكهة
✅ نقلل من السكريات و الحلويات و الاكل من برة ..
✅ نهتم بالعسل و المكسرات و الجزر و البطاطا 👍
🔵4- شرب الماء : تأكدي انه طفلك بيشرب مياه بصورة كافية و مناسبة لسنه
🔵5- النوم بدري بدري و عدم السهر : تنظيم النوم مهم جدا للنمو و المناعة
🔵6- الحرص على ممارسة الرياضة بانتظام خارج المنزل : من 30-60 دقيقة 3 مرات اسبوعيا على الاقل
🔵7- غسيل الاسنان : مع معجون خاص للاطفال ، و تغيير الفرشاة كل شوية
🔵8- غسيل الايدين :
مهم مهم مهم مهم جدا ، تعودي طفلك و تعودي نفسك على غسيل الايدين باستمرار
🔹قبل و بعد الاكل
🔹قبل و بعد الحمام
🔹اول ما يدخل البيت
🔹بعد الاستيقاظ و قبل النوم
🔹بعد اللعب مع الحيوانات
🔵9- تجنبي تعرض الطفل لدخان السجائر : او الشيشة او الفيب .. سموم مالهاش اول من اخر و حساسيات و مشاكل .. تفاديها بحزم و قوة 💪
🔵10- فيتامين د : الفيتامين الاول لتقوية المناعة .. احسن من اوميجا ثري و فيتامين سي ، و المطلوب ببساطة التعرض للشمس ربع ساعة يوميا 4 ايام في الاسبوع ، الجرعات الوقائية للناس اللي معندهاش شمس ( خليج – اوروبا مثلا ) مهمة ..
🔵11- عدم اعطاء المضادات الحيوية بدون داعي :
المدمر الاقوى لمناعة طفلك .. و سبب الخناقات الرئيسي بيني و بين الامهات .. خلي ايدك خفيفة على المضادات الحيوية و سيبي مناعة طفلك تقوم بدورها الطبيعي 👌
🔵12- البروبايتوكس :
سواء في شكل ادوية ، او في بعض الاكلات زي الزبادي مثلا .. و بعض الادوية زي البرونكوفاكسوم و الاميوجارد ساعات بتكون مفيدة .. و لكن متديش دوا من نفسك بدون الرجوع لطبيبك 🤓
🔵13 – الحب و السعادة و التفاهم في المنزل :
لا تبخلي في اظهار حبك و اهتمامك لطفلك و ابعدي طفلك عن مشاكلك الشخصية ، صدقي او لا تصدقي كل ما كان جو البيت
صافي و سعيد كل ما كان طفلك مناعته اكتر !!
🔵14- ابعدي طفلك عن اي شخص مريض ، او اي تجمعات منتشر فيها اي مرض لا قدر الله
🔵15- بلاش النظافة و الحسوكة المرضية : شجعيه يلعب برة البيت و يكتشف الدنيا و هدومه تتوسخ شوية ، التعرض لبعض البكتريا بيحسن و يقوي جهاز المناعة ، بلاش عيشة الديتول دي 😁
يعني من الاخر ، رضعي طبيعي و اكلي ابنك اكل طبيعي و اخرجي مع ابنك و انطلقي معاه في حياة طبيعية مليانة حركة و بركة ، بعيدة عن الاكل المصنع و القعدة بالساعات قدام التليفزيونات و الموبايلات ، ابعدي عن السجائر و الادوية اللي مالهاش لازمة .. عيشي بنظافة بس بلاش حسوكة .. و استمتعي بحياتك و ابعدي عن الغم و النكد .. هتطلعي ابنك سوبر هيرو و مناعته فل الفل بإذن الله
د احمد عبد الرحمن
اخصائى طب الاطفال