التخطي إلى المحتوى

كتبت : سالى عبده

عزيزتى الأم
هنقدم لك شوية نصائح تساعدك على تنظيم يوم ابنك الدراسى :

–  حاولي تكوني خلصتي تحضير الغدا قبل ما يوصل البيت.
–  سيبي ابنك يرتاح شويه من مجهوده ف المدرسه بس بلاش ينام بالنهار عشان ينام ع الساعه 9 بالليل و يكون ده ميعاد نومه الثابت.
– إسأليه عملت ايه ف المدرسه طول اليوم عشان ميجيش وقت المذاكره يقعد يقولك ماما ده حصل كذا و كذا .
– لو بياخد دروس بلاش يكون بعد المدرسه ع طول عشان يركز.
– طبعا أبنك أكل و شرب و أرتاح و جه وقت المذاكره و خلاص مفيش حجج تانيه..
– ياريت بلاش تليفزيون مفتوح و دوشه جنبه و ناس قاعده بتتكلم أكيد الولد مش هيركز .
– ظبطي مكان مريح و عوديه يكتب ع مكتب بلاش السرير و الأرض عشان الخط يبقى مظبوط..
– بيعمل الواجب و كتب بخط وحش امسحي الواجب و يتعاد عشان يتعود أنه يتقن اللي بيعمله و تقولي له :- ان رسولنا الكريم اللهم صل وسلم  قال فيما معناه إن الله يحب إذا عمل أحدكم عملا أن يتقنه .
– بلاش تضربي ف الولد عشان مفهمش اللي بتشرحيه .
– مفهمش مش مشكله عيدي مفهمش تاني يبقى انت مش عارفه توصلي المعلومه و شوفي طريقه تانيه وصليها له بها.
– لو مفهمش بردو خليه يقوم من المذاكره ياخد راحه خمس دقايق .
– ذاكري له اي ماده تانيه و أرجعي للماده اللي مكنش فاهمها و اشرحيها تاني. بس بالله عليكى بلاش عصبيه ف المذاكره وبلاش يا غبي و يا حمار و الكلام ده لانك كده بتقنعيه انه غبي مره ع مره هيصدقك و يستسلم و يبقى غبي بجد .
– لو ابنك بيتحرك كتير خليه يذاكر ع مكتب و وشه ف الحيطه مفيش شباك ولا صوره ولا تكون الحيطه مليانه الوان كتير يعني متخليش حاجه تجذب انتباهه.
– اللي بتذاكريه مع ابنك خليه هو يشرحه لك أديله ثقه ف نفسه و انه يعتمد عليه يقدر يفهمك الدرس .
– أديله أي حاجه ف إيده و مثلي معاه أن ف إيده ميكرفون و أنه بيتكلم ف الإذاعه .
– خليه يمثل دور المدرس و يسألك و أنت إعملي مش عارفه الحل و تسأليه و خليه هو يجاوب .
– بين كل ساعه مذاكره إديله عشر دقائق راحه.
– ابتدي معاه بمذاكره الماده الصعبه بالنسبه له.
– قولي له أنت شاطر -أحسنت – بارك الله فيك أحضنيه و بوسيه و طبطبي عليه الكلام ده بيفرق مع الأطفال جدا .
– ياريت لو في خروجه أخر الأسبوع كنوع من التحفيز .
– خليه يستمتع بوقت مذاكرته معاكي وصليه لدرجه ان هو اللي يطلب مذاكرتك معاه و سيبي الواد متعلنيش عليه الحرب .
– أوعي متحفظهوش القرأن داومي ع تحفيظه كل يوم . علميه القرأن والقرأن هيعلمه كل حاجه .

عام دراسى سعيد و بالتوفيق والنجاح لكل الطلاب .

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *